Breaking News


အကာအကွယ် မဲ့နေသော ညဥ့်ငှက်မလေးများ


Loading...

အခု ဒီမှာရပ်နေတဲ့သူတွေအကုန်လုံးက ထမင်းငတ်လို့လာလုပ်ကြတာပဲ။ ဘယ်သူမှ မလုပ်ချင်ဘူး။ တချို့က ပြောကြတယ်။ နင်တို့က အမေပေးတဲ့ လယ်တစ်ကွက်နဲ့ အလကားလုပ်စားနေတာ။ 
---------------------------------------------------------------
ရှေးယခင် ဘုရင်များလက်ထက်တွင် အမျိုးသမီးတစ်ဦးသည် အင်မတန် ရုပ်ဆင်းအင်္ဂါ လှပ ကြောင်း မင်းညီ မင်းသားများအကြား သတင်းပြန့်နေသည်။ ထို့ကြောင့် မင်းညီမင်းသားများသည် ဤကဲ့သို့ အင်မတန် ရုပ်ဆင်းအင်္ဂါလှပသည့် သမီးပျိုအား ပိုင်ဆိုင်ခွင့်ရလိုစိတ်များ တဖွားဖွား ပြင်းပြလာခဲ့ကြသည်။ သို့သော် မင်းညီ မင်းသားများ၏ သမီးပျိုလေးအား ပိုင်ဆိုင်ခွင့်ရလိုစိတ်များ ပြင်းပြလာသည် နှင့်အမျှ ရန်လိုမှုမရှိရာမှ ရန်လိုမှုအသွင်သို့ ပြောင်းလဲသွားကာ စစ် ဖြစ်ပွားမည့်အလာအလားသို့ ပြောင်းလဲသွားခဲ့ကြသည်။
ထိုအချိန်တွင် ပညာရှိအမတ်တစ်ဦးမှ ပညာရှိနည်းဖြင့် စဉ်းစားတွေးခေါ်ကာ မင်းညီမင်းသားအားလုံးအား အတွေးတစ်ခုပေးလိုက်သည်။ ထိုအတွေးမှာ တစ်ယောက်တည်းပိုင်ဆိုင်ခြင်းမဟုတ်ဘဲ တစ်ယောက်တစ်လှည့် ပေါင်းသင်းဆက်ဆံပါက ယခုစစ်ဖြစ်ပွားမည့် အလားသဏ္ဌာန်ကိုလည်း ကာကွယ်နိုင်မည်ဖြစ်ပြီး မိမိတို့လိုအင်ဆန္ဒ ကိုလည်း ဖြည့်ဆည်းပေးနိုင်မည်ဖြစ်ကြောင်း ပြောကြားလိုက်သည်။ အဆိုပါပညာရှိ၏ ပြောကြားချက်အတိုင်း မင်းညီ မင်းသားများက သဘောတူလက်ခံလိုက်ကာ အင်မတန် ရုပ်ဆင်းအင်္ဂါလှပ သော သမီးပျိုလေးအား တစ်ယောက်တစ်လှည့် ပေါင်းသင်းဆက်ဆံခဲ့ကြရာမှ တိုင်းပြည်၏ ပြည့်တန်ဆာအဖြစ် အမည်နာမ ပေါ်ထွန်းလာခဲ့သည်။

တိုင်းပြည်၏ ပြည့်တန်ဆာဟု သမုတ်ခံရသော အမျိုးသမီး လိင်လုပ်သားများသည် ကမ္ဘာ့နိုင်ငံအသီးသီးတွင် မရှိမဖြစ်အရာအဖြစ် ယနေ့တိုင် နေရာယူနေဆဲဖြစ်သည်။ သို့သော် ကမ္ဘာ့နိုင်ငံအသီးသီးမှ ခံယူချက်နှင့် မူဝါဒပိုင်းဆိုင်ရာများမတူညီခြင်းကြောင့် တချို့နိုင်ငံများတွင် ပြည့်တန်ဆာများအဖြစ် လုပ်ကိုင်ဆောင်ရွက်နေသူများမှာ ဥပဒေအကာအကွယ်ဖြင့် ကောင်းမွန်စွာ အသက်မွေးဝမ်းကျောင်းကို လုပ်ကိုင်ဆောင်ရွက်သွားနိုင်သော်လည်း တချို့သောနိုင်ငံများ မှာတော့ ပြည့်တန်ဆာများကို ဥပဒေအရ အကာအကွယ်ပေးခြင်း မရှိသည့်အပြင် ဖိနှိပ်ချုပ်နှောင်မှုများ ပြုလုပ်ခြင်းများလည်း ရှိနေ ပါသည်။ ထုိ့အထဲတွင် မိမိတို့မြန်မာနိုင်ငံလည်း အပါအဝင် ဖြစ်သည်။ မြန်မာနိုင်ငံတွင် ပြည့်တန်ဆာများကို ဥပဒေကြောင်းအရ အကာအကွယ်ပြုခြင်းမဟုတ်ဘဲ ၁၉၄၉ ပြည့်တန်ဆာနှိပ်ကွပ်ရေးဥပဒေကို ပြဋ္ဌာန်းကာ လိင်လုပ်သား(ပြည့်တန်ဆာ)များကို ဖမ်းဆီးအရေးယူမှုများ ပြုလုပ်လျက်ရှိသည်။

''လိင်လုပ်သားတွေဟာ လိင်လုပ်သားတွေအဖြစ် လုပ်ကိုင်တဲ့အခါမှာ ဥပဒေကြောင်းအရ ဖမ်းဆီးချုပ်နှောင်မှုတွေကို ခံရသလို ခွဲခြားဆက်ဆံမှုတွေကိုလည်း ခံနေရပါတယ်။ ပြီးတော့ ကျန်းမာရေး စောင့်ရှောက်မှုအကူအညီတွေလည်း ရရှိတာ မရှိဘူး။ ဒါကြောင့် အဘက်ဘက်က ဆုံးရှုံးနေရတယ်''ဟု လိင်လုပ်သားအဖြစ် အသက် မွေးဝမ်းကျောင်းပြုခဲ့ပြီးနောက် လက်ရှိ တော်ဝင်ခရေလူမှုကွန်ရက်တွင် စူပါဗိုက်ဆာအဖြစ် တာဝန်ယူ၍ လိင်လုပ်သားများ အသိပညာ ပေးလုပ်ဆောင်နေသူ မသက်(အမည်လွှဲ)က သူ၏အတွေ့အကြုံကို ပြောပြသည်။ ထို့အပြင် အစိုးရတာဝန်ရှိသူများအနေဖြင့် အမျိုးသမီး လိင်လုပ်သားများအား ဥပဒေကြောင်းအရ အကာအကွယ် ပေးစေလို ကြောင်း၊ ကျန်းမာရေးစောင့်ရှောက်မှုလုပ်ငန်းများ ဆောင်ရွက်ပေး စေလိုကြောင်း၊ အမျိုးသမီးလိင်လုပ်သားများကို တရားဝင်လုပ်ကိုင်ခွင့်ပြုစေလိုကြောင်း၊ ယင်းကဲ့သို့ဆောင်ရွက်ပေးပါက လက်ရှိမြန်မာ နိုင်ငံတွင် ဖြစ်ပွားနေသော HIV/AIDS  ဖြစ်ပွားလာနှုန်းကိုလည်း တားဆီးနိုင်မည်ဟု သူမက အကြုံပြု တိုက်တွန်းပြောကြားသည်။

မြန်မာနိုင်ငံတွင် HIV/AIDS ဖြစ်ပွားမှုနှုန်းမှာ လူဦးရေ သိန်းချီရှိနေပြီး HIV/AIDS ဖြစ်ပွားမှုအများဆုံးအုပ်စုမှာ လိင်လုပ်သားများ၊ Man to Man ၊ မူးယစ်ဆေးဝါးသုံးစွဲသူများ စသည့် အုပ်စုသုံးအုပ်စုထဲမှ လိင်လုပ်သားများကို အစိုးရအနေဖြင့်ဖိနှိပ်မှုအများဆုံး လုပ်ဆောင်နေကြောင်းသိရသည်။ အဆိုပါဖြစ်စဉ်များနှင့်ပတ်သက်ပြီး မည်သို့ပင်ဆိုစေကာမူ လိင်လုပ်သားများသည် အခြားသောနိုင်ငံသားများကဲ့သို့ ဥပဒေ၏စောင့်ရှောက်မှုကို ခံယူနိုင်ရန် အခွင့်အရေးရှိကြောင်း၊ လိင်လုပ်သား များသည် အခြားသောနိုင်ငံသားများကဲ့သို့ ကျန်းမာရေးဝန်ဆောင်မှု များ ခံယူနိုင်ရန် အခွင့်အရေးရှိကြောင်း၊ ကျန်းမာရေး ထောက်ပံ့သူများကလည်း လိင်လုပ်သားများ ကျန်းမာရေးခံယူမှုအပေါ်တွင် အရှက်သိက္ခာမကျဆင်းစေရဘဲ အခြားသော နိုင်ငံသားများကဲ့သို့ ဆက်ဆံရမည်၊ လိင်လုပ်သားများသည် အကြမ်းဖက်မှု၊ ကြောက်လန့်မှု၊ ထောင်ချခံရမှု၊ အရှက်ရစေမှုနှင့် ခွဲခြားဆက်ဆံမှုတို့ မရှိစေဘဲ ကျန်းမာရေးနှင့် အခြားသောဝန်ဆောင်မှုများကို သုံးစွဲနိုင်သင့်ကြောင်း၊ ရဲများနှင့်တရားဥပဒေဆိုင်ရာ အကြီးအကဲများသည် သင့်တော်သော ဥပဒေမူဝါဒများနှင့် ကျင့်ထုံးများကို ပြန်လည်ဖွဲ့စည်းရာတွင် ကျန်းမာရေးအဖွဲ့အစည်းများအပါအဝင် လိင်လုပ်သားများ အဖွဲ့အစည်းများနှင့် ပူးပေါင်းဆောင်ရွက်သင့်သည်ဟု UNAIDS နှင့် UNFPA အဖွဲ့အစည်းတို့က အကြံပြု တိုက်တွန်းပြောကြားသည်။

သို့သော်လည်း မြန်မာနိုင်ငံတွင် ၁၉၄၉ ပြည့်တန်ဆာနှိပ်ကွပ် ရေးဥပဒေကို ပြဋ္ဌာန်း၍ လိင်လုပ်သားများ(ပြည့်တန်ဆာ)များကို အာဏာပိုင်အဖွဲ့အစည်းများက ဖမ်းဆီးအရေးယူမှုများ ပြုလုပ်လျက်ရှိပြီး လိင်လုပ်သားများကို ခေါင်းဆိုသူများကလည်း ဝန်ဆောင်ခ ခေါင်းပုံဖြတ်ခြင်းများ ပြုလုပ်တာခံနေရသလို ဧည့်သည်များမှ အနိုင်ကျင့်ခေါင်းပုံဖြတ်မှုများ ကြုံတွေ့ခံစားရလျက်ရှိသည်။ ၁၉၄၉ ပြည့်တန်ဆာနှိပ်ကွပ်ရေးဥပဒေကို ၁၉၅၆ ခုနှစ် ဇူလိုင် ၂ဝ ရက်က ၁၉၅၆ ခုနှစ် အက်ဥပဒေအမှတ် ၁၉ ဖြင့် ၁၉၅၆ ခုနှစ် ပြည့်တန်ဆာပပျောက်ရေး(ပြင်ဆင်ချက်)အက်ဥပဒေဖြင့် ပြန်လည် ပြဋ္ဌာန်းလာခဲ့သည်။ အဆိုပါဥပဒေတွင် အက်ဥပဒေ၏ ပုဒ်မ ၃ ၌ ''ထောင်ဒဏ် တစ်နှစ်ထိဖြစ်စေ၊ ငွေဒဏ်နှင့်ထောင်ဒဏ် နှစ်ရပ်စလုံးဖြစ်စေ စီရင်နိုင်စေရမည်'' ဆိုသည့် စကားရပ်အစား ''တစ်နှစ်အောက်မနည်း သုံးနှစ်ထက်မပိုသည့် ထောင်ဒဏ် စီရင်နိုင်စေရမည်။ ပြစ်ဒဏ်စီရင် ခြင်း ခံရသူသည် မိန်းမဖြစ်လျှင် ထိုမိန်းမကို သတ်မှတ်ထားသည့် ဌာန၌ တားဆီးထိန်းသိမ်းထားခြင်းအားဖြင့် ထောင်ဒဏ်ကျခံစေရ မည်''ဆိုသည့် စကားရပ်ကို ထည့်သွင်းရမည်။

ထို့အပြင် ပုဒ်မ ၅ ပုဒ်မခွဲ(၁)တွင် ''သုံးနှစ်ထိ ထောင်ဒဏ်စီရင် နိုင်စေရမည်'' ဆိုသည့် စကားရပ်အစား ''တစ်နှစ်အောက်မနည်း သုံးနှစ်ထက်မပိုသည့် ထောင်ဒဏ်စီရင်နိုင်စေရမည်''ဆိုသည့် စကားရပ်ကို ထည့်သွင်းရ မည်။ အလားတူ ပုဒ်မ ၆ ''ငွေဒဏ်နှင့် တကွ၊ အလုပ်ကြမ်းနှင့် သုံးနှစ်ထိ ထောင်ဒဏ် စီရင်နိုင်စေရမည်''ဆိုသည့် စကားရပ်အစား ''အလုပ် ကြမ်းနှင့် တစ်နှစ်အောက်မနည်း သုံးနှစ်အထက်မပိုသည့် ထောင်ဒဏ်စီ ရင်နိုင်စေရမည်'' ဆိုသည့် စကားရပ်ကို ထည့်သွင်းရမည်။ ပုဒ်မ ၁၃၊ ပုဒ်မခွဲ(၂)တွင် ''ရှာဖွေခြင်းခံရသူတို့အား''ဆိုသည့် စကားရပ်အစား ''ရှာဖွေခြင်းခံရသူတို့အပြင်၊ ပြည့်တန်ဆာအဖြစ် အသက် မွေးသူနှင့် ကာမစပ် ယှက်ရန် ရောက်ရှိနေသူတို့အား''ဆိုသည့် စကားရပ်ကို ထည့်သွင်းရမည်ဟု ပြဋ္ဌာန်းချက်များ ပါရှိသည်။ မြန်မာနိုင်ငံတွင် ပြည့်တန်ဆာများအတွက် ဥပဒေတစ်ရပ်ပြဋ္ဌာန်းထားသော်လည်း ကာကွယ်ပေးခြင်းမဟုတ်ဘဲ ပပျောက်ရေး (ယခင်နှိပ်ကွပ်ရေး)ပုံသဏ္ဌာန်ဖြစ်နေခြင်းကြောင့် ထိုသူများသည် မွေးရာပါလူ့အခွင့်အရေးများကို ဆုံးရှုံးနေကြရပြီး လူ့အခွင့်အရေး စံချိန်စံနှုန်းများအရ ရရှိသင့်သော လူ့အခွင့်အရေးများကိုလည်း ပိုင်ဆိုင် ခွင့် မရဘဲ ဖြစ်နေသည်။

လက်ရှိ မြန်မာနိုင်ငံအတွင်း လိင်လုပ်သားများသည် မှောင်ရိပ်ခိုမှု၊ အများသူငါသွားလာလှုပ်ရှားနေသော လူမြင်ကွင်းအတွင်း ဧည့်သည်ရှာဖွေနေမှု၊ သွေးဆောင်ဖြားယောင်မှု စသည့်ကိစ္စရပ်များ အပါအဝင် တခြားသော ကိစ္စရပ်များဖြင့် အာဏာပိုင်အဖွဲ့အစည်းများက အရေးယူဆောင်ရွက်မှုများ ပြုလုပ်လေ့ရှိသည်။ ''အရင်တုန်းကတော့ ပြည့်တန်ဆာတွေကိုဖမ်းတာ ရဲအက်ဥပဒေ ပုဒ်မနဲ့ဘဲ တပ်ပြီးအရေးယူတာပေါ့။ ပုဒ်မတွေပြောမယ့်အစား ဖြစ် စဉ်အရင်းကိုဘဲ ပြောရရင် မှောင်ရိပ်ခိုခြင်းအားဖြင့် ပြစ်မှုကိုဖြစ်ပွားစေတဲ့ အကြောင်းအရာလို့ အရင်က သုံးသပ်ကြတယ်။ ရဲအက်နဲ့ ဆွဲတယ်ဆိုတာက မှောင်ရိပ်ခိုခြင်းအားဖြင့် လုယက်မှုလုပ်နိုင်တယ်၊ ပြစ် မှုမကင်းတဲ့ အလုပ်တစ်ခုခုကို လုပ်နိုင်တယ် ဆိုပြီးတော့ ပြစ်မှု ကြီးတွေမဖြစ်အောင် ကြိုတင်ကာကွယ်တဲ့အနေနဲ့ ဆောင်ရွက်တယ်'' ဟု ယခင် ရန်ကုန်တိုင်းဒေသကြီး ရဲတပ်ဖွဲ့မှူးရုံးတွင် တာဝန်ထမ်း ဆောင်ခဲ့ပြီး ယခု ပြည်နယ်တစ်ခု၌ ပြောင်းလဲတာဝန်ထမ်းဆောင်နေ သော ရဲမှူးကြီးတစ်ဦးက ဆိုသည်။

ပြည့်တန်ဆာ(လိင်လုပ်သား)အဖြစ် အသက်မွေးဝမ်းကျောင်း လုပ်ကိုင်ဆောင်ရွက်နေသူများသည် မွေးရာပါစိတ်ခံစားချက်ကြောင့် လုပ်ကိုင်ဆောင်ရွက်နေကြရခြင်းမျိုး မဟုတ်ဘဲ မိမိ၏မိသားစု စားဝတ်နေရေးအတွက် မိမိဘဝကိုအရင်းအနှီးပြု၍ လုပ်ကိုင်ဆောင်ရွက်နေရသူများ ဖြစ်သည်။ ထိုသူများသည် လူမှုအသိုင်းအဝိုင်းများအကြား ခွဲခြားဆက်ဆံမှုများကို ခံစားနေရသကဲ့သို့ အာဏာပိုင်အဖွဲ့အစည်းများ၏ ဖမ်းဆီးအရေးယူခံရခြင်း၊ ခေါင်းဖြစ်သူ၏ လုပ် အားခ ခေါင်းပုံဖြတ်ခံရခြင်း၊ ဧည့်သည်များမှ အနိုင်ပြုကျင့်မှုများ ခံရခြင်း စသည့်အခက်အခဲများကို ရင်ဆိုင်ကျော်ဖြတ်ကာ မိသားစု စားဝတ်နေရေးကို ဖြေရှင်းနေရသူများ ဖြစ်ကြသည်။ သို့သော် မြန်မာနိုင်ငံတွင် ထိုအစုအဖွဲ့လေးအား ဥပဒေအရအကာအကွယ်ပေးခြင်းမရှိဘဲ ပပျောက်ရေး(ဝါ) ဖိနှိပ်ရေးဆိုသည့် ဥပဒေတစ်ရပ်ကို ပြဋ္ဌာန်းကာဒဏ်ခတ်ထားကြသည်။ ထိုဖြစ်ရပ်များနှင့်ပတ်သက်ပြီး ပြည့်တန်ဆာအဖြစ် အသက် မွေးဝမ်းကျောင်းပြုနေသော အသက် ၂၇နှစ်အရွယ် မမြင့်မြင်ခိုင်က ''လမ်းဘေးက အဖမ်းအဆီးများတယ်။ ဖမ်းတဲ့ပုံစံတွေကလည်း လျှပ် ပေါ်လော်လီဝတ်ဆင်တာတွေ၊ မှောင်ရိပ်ခိုတာတွေ၊ အမျိုးစုံအောင် ဖမ်းတယ်။ အသွင်ယူဖမ်းတာက ခဏခဏကြားနေရတာပဲ။ အသွင် ယူ ဖမ်းတာက သက်သေရအောင် ဆိုတာမျိုးတွေလဲ ကြားရတယ်။

ကျွန်မတို့ကိုခေါ်ပြီး လိင်ဆက်ဆံတယ်။ ဆက်ဆံပြီးရင် ၃(ခ)နဲ့ ဖမ်းတယ်ဆိုပြီး ပြောတယ်''ဟု ပြည့်တန်ဆာလုပ်ကိုင်သူများ ကြုံတွေ့နေရသော အခက်အခဲများကို ပြောပြသည်။ ယင်းနောက် သူမကဆက်လက်၍ပြောရာမှာ မိမိတို့လောက ထဲတွင် အများစုမှာ ရောဂါရကုန်ကြပြီး ကျန်းမာရေးအဖွဲ့အစည်းများက ကွန်ဒုံးသုံးရန် အသိပညာပေးမှုများ ပြုလုပ်နေသော်လည်း သုံးစွဲသူများက ကွန်ဒုံးအသုံးမပြုလိုကြောင်း ငြင်းဆန်သည့်အခါ မိမိကျန်းမာရေးထက် ဝမ်းစာရေးအတွက် လိုအပ်နေသော ငွေရရှိ ရေးကို ဦးစားပေးခဲ့ရကြောင်း၊ သုံးစွဲသူများမှာ သာမန်နည်းမဟုတ်ဘဲ လူမဆန်သည့် လိင်ဆက်ဆံမှုများ ပြုမူဆက်ဆံခံရခြင်းစသည့်အခက်အခဲများ ကြုံ တွေ့ရကြောင်း ဆိုသည်။

''နောက်တစ်ခုက ကွန်ဒုံးဆောင်တာကို သက်သေအဖြစ်ယူပြီး ဖမ်းဆီးတာပဲ။ Workshop တွေမှာ ပြောပြတာ ကြားဖူးတာက သူများနိုင်ငံမှာဆို လိင်လုပ်သားတွေအတွက် အကာအကွယ်အများကြီးရှိတယ်။ လိုင်စင် တွေရှိတယ်။ စည်းမျဉ်းတွေရှိတယ်။ ကာကွယ်မှုတွေရှိတယ်။ သူများတွေဆီမှာက ကွန်ဒုံးမသုံးရင် လိင်ဆက်ဆံခွင့်မပေးဘူး။ မဆောင်ထားရင် အရေးယူတယ်။ ဒီမှာက ဆောင်ထားရင်ကို သက်သေယူနေတဲ့ပုံစမျိုး'' ဟု ပြည့်တန်ဆာလုပ်ငန်း လုပ်ကိုင်သူ မမြင့်မြင့်ခိုင်က သူမတို့လောကထဲတွင် ကြုံတွေ့နေရသော အခက်အခဲများကို ပြောပြသည်။  လက်ရှိ ရန်ကုန်တိုင်းဒေသကြီးတွင် ပြည့်တန်ဆာ(ဝါ)လိင်လုပ်သားအဖြစ် အသက်မွေးဝမ်းကျောင်းပြု၍ ဖမ်းဆီးခံခဲ့ရသော အမှုများမှာ အလွန်များပြားလှပါသည်။ ၂ဝ၁၆ ခုနှစ် ဇန်နဝါရီလမှ ဇူလိုင်လအထိ ပြည့်တန်ဆာအမှုပေါင်း ၄၉ဝ ရှိခဲ့ပြီး ၂ဝ၁၅ ခုနှစ် တွင် ၅၄၆ မှု၊ ၂ဝ၁၄ ခုနှစ်အတွင်း ၁၇၇၂ မှု အသီးသီးရှိခဲ့ကြောင်း ရန်ကုန်တိုင်းဒေသကြီးရဲတပ်ဖွဲ့ရုံး၏စာရင်းများအရ သိရှိရသည်။ ယင်းနောက် ၂ဝ၁၃ ခုနှစ် ဇန်နဝါရီလမှ မေလအထိ အမှု ၆၄ဝ ၊ ၂ဝ၁၂ ခုနှစ်တွင် ၃၂၂၆ မှု၊ ၂ဝ၁၁ ခုနှစ်မှာ ၁၉၆၅ မှု တို့အထိ ရှိကြောင်း သိရသည်။

အဆိုပါ ပြည့်တန်ဆာအမှုပေါင်းစာရင်းများကို ကြည့်မည်ဆိုပါက မြန်မာနိုင်ငံရှိ ပြည့်တန်ဆာ(ဝါ) လိင်လုပ်သားများအဖြစ် လုပ်ကိုင်ဆောင်ရွက်နေသူများသည် အကျဉ်းထောင်ထဲသို့ မည်မျှ ရောက်ရှိနေမည်လဲဆိုခြင်းကို မှန်းဆနိုင်မည်ဖြစ်သည်။ ထိုသို့ ပြည့်တန်ဆာ(ဝါ) လိင်လုပ်သားများအား ဖမ်းဆီးထားပြီး ကျန်းမာရေးစောင့်ရှောက်မှုအရ အကာအကွယ်ပေးထားခြင်း မရှိကြောင်းကိုလည်း သိရသည်။ ထိုသို့ ကျန်းမာရေးစောင့်ရှောက်မှု အရ အကာအကွယ်ပေးထားခြင်း မရှိသည့်အတွက် HIV/AIDS ဖြစ်ပွားမှုနှုန်းကို မတားဆီးနိုင်သည့်အပြင် ပိုမိုတွန်းအားပေးနေသည့် သဘောသို့ သက်ရောက်သွားစေပါသည်။ အဘယ်ကြောင့်ဆိုသော် ထိုသို့ အာဏာပိုင်အဖွဲ့အစည်းများမှ ကျန်းမာရေးစောင့်ရှောက်မှု မရှိသလို ဆေးစစ်မှုများမပြုလုပ်ဘဲ အကျဉ်းထောင်ထဲသို့ ထည့်သွင်းလိုက်မည်ဆိုပါက ထိုများပြားလှသည့် ပြည့်တန်ဆာ(ဝါ)လိင်လုပ်သားများထဲမှ တစ်ဦးတစ် ယောက် ထံတွင် HIV/AIDS ပါလာမည်ဆိုလျှင် တစ်ဦးမှတစ်ဦး ကူးစက် ပြန့်ပွားကာ ဖြစ်ပွားမှုနှုန်းကို မြန်စေရန် တွန်းအားပေးလိုက်သကဲ့သို့ ဖြစ်စေပါသည်။ မြန်မာနိုင်ငံတွင် ၁၉၈၆ ခုနှစ်က HIV (ခုခံအားကျဆင်းသည့် ရောဂါ) ရှိသူ ၂ဝဝဝ ခန့်သာရှိသော်လည်း ၂ဝ၁၅ ခုနှစ်အတွင်းတွင် လူဦးရေ နှစ်သိန်းကျော် ဖြစ်ပွားလာခဲ့ကြောင်း ပြည်သူ့ကျန်းမာရေး ဖောင်ဒေးရှင်းမှ သိရသည်။

လိင်လုပ်သားများကို ကူးစက်ရောဂါများမှ ကာကွယ်နိုင်ရန် အချို့နိုင်ငံများတွင် အကာအကွယ်ပစ္စည်း(ကွန်ဒုံး)များ သုံးစွဲရန် ဥပဒေဖြင့် ပြဋ္ဌာန်းထားခြင်းရှိသော်လည်း မြန်မာနိုင်ငံတွင် မရှိသေး သောကြောင့် လိင်လုပ်သားများအနေဖြင့် အကာအကွယ်ပစ္စည်း (ကွန်ဒုံး)သုံးရန် တောင်းဆိုခွင့်မရသောကြောင့် ကူးစက်ရောဂါအန္တရာယ်များ ယနေ့တိုင် ရှိနေဆဲဖြစ်ကြောင်း ဒေါက်တာစံပယ်ဖြူက ဆိုသည်။  အလားတူ ရှေ့နေဦးခင်ဇော်က ပြည့်တန်ဆာလုပ်နေသည့် အမျိုးသမီးများသည် ဥပဒေကို မကြောက်၍မဟုတ်ကြောင်း၊ ၎င်းတို့မိသားစု ဝမ်းရေးအတွက် လုပ်နေရခြင်းသာဖြစ်ကြောင်း၊ ယခုလိုလုပ်ပါက ဥပဒေ(ပြည့်တန်ဆာနှိပ်ကွပ်ရေးအက်ဥပဒေ)ကို ချိုးဖောက်မိမည်ဆိုခြင်းအား ပြည့်တန်ဆာလုပ်နေသည့် အမျိုးသမီးတိုင်းသိကြောင်း၊ ထိုသူများကိုကယ်တင်ရန်အတွက် အလုပ်အကိုင်အခွင့်အလမ်းများ၊ ပညာအရည်အချင်းများအများကြီး မြှင့်တင်ပေးရန်လိုအပ်ကြောင်း ဆိုသည်။

''ဒါဆိုရင် ဒီလောက်မကောင်းတဲ့အလုပ်ကို ဘယ်သူကလုပ်မှာလဲ။ ပြည့်တန်ဆာလုပ်ငန်း လုပ်ကိုင်နေသူတွေဟာ တိုင်းပြည်ဆင်းရဲမွဲတေမှု၊ အလုပ်အကိုင်ရှားပါးမှု၊ ပညာအရည်အချင်း နိမ့်ကျမှုတွေ ကြောင့် လုပ်နေရတာ။ ပြည့်တန်ဆာမိန်းကလေးတွေကို အပြစ်ပြောမယ့်အစား သူတို့တွေကို ပိုက်ဆံပေးပြီး ကျူးလွန်တဲ့သူတွေကိုလည်း အပြစ်ပေးသင့်တယ်။ အဲဒီသူတွေကျတော့ သက်သေဆိုပြီးလုပ်တယ်။ သူတို့တွေက ပျော်လို့ လုပ်စားနေတာမဟုတ်ပါဘူး''ဟု ရှေ့နေ ဦးခင်ဇော်က သူ၏သဘောထားကို ပြောပြသည်။ အဆိုပါ ပြည့်တန်ဆာများအရေးကိစ္စနှင့်ပတ်သက်ပြီး လွှတ် တော်ကိုယ်စားလှယ် ဒေါ်စန္ဒာမင်းသည် ပြီးခဲ့သည့် ၂ဝ၁၅ ခုနှစ် ပထမအကြိမ် ပြည်သူ့လွှတ်တော် သတ္တမအကြိမ် ပုံမှန်အစည်းအဝေး ၌ ပြည့်တန်ဆာနှိပ်ကွပ်ရေးအက်ဥပဒေကို ပြင်ဆင်ရေးဆွဲရန် အစီအစဉ်ရှိမရှိ အဆိုတင်သွင်းကာ မေးမြန်းခဲ့ဖူးသည်။ ဒေါ်စန္ဒာမင်း၏အဆိုကို ပြည်ထဲ ရေးဝန်ကြီးဌာန ဒုတိယဝန်ကြီး ရဲချုပ်ကျော်ကျော်ထွန်းက အဆိုပါဥပဒေကို ပြန်လည်ပြင်ဆင်ရေးဆွဲရန် အစီအစဉ်မရှိကြောင်း ဖြေကြားခဲ့ရာမှ အဆိုအောင်မြင်မှုမရှိခဲ့ပေ။ အလားတူ မြန်မာနိုင်ငံယဉ်ကျေးမှုအရ မကိုက်ညီသည့် လူ့အသိုင်းအဝိုင်းအကြားမှာလည်း ဒေါ်စန္ဒာမင်းအား ဝေဖန်မှုများ ထွက်ပေါ်လာခဲ့သေးသည်။

ပြည့်တန်ဆာလုပ်ငန်းဖြင့် ဖမ်းဆီးခံရပါက ထိုသူသည် ''တစ်နှစ်ထက် မနည်းစေရ၊ သုံးနှစ်ထက်မပိုစေရ''ဆိုသော ထောင်ဒဏ်ကိုချမှတ်ခံရလေ့ရှိသည်။ ထို့ကြောင့် ပြည့်တန်ဆာလုပ်ငန်းဖြင့် အသက်မွေးဝမ်းကျောင်းသူများအတွက် စိတ်ဓာတ်ပိုင်းဆိုင်ရာများ ယိုယွင်းပျက်စီးသွားခဲ့ကြသလို ထိုသူအား မှီခိုနေရသောမိသားစုစားဝတ် နေရေးမှာလည်း အခက်အခဲများစွာကြုံတွေ့ရကြောင်း ပြည့်တန်ဆာလုပ်ငန်းဖြင့် အသက်မွေးဝမ်းကျောင်း ပြုနေသူများကဆိုသည်။ ပြည့်တန်ဆာအဖြစ် အသက်မွေးဝမ်းကျောင်းလုပ်ကိုင်နေသူများအပါအဝင် ပြည့်တန်ဆာများကို အသိပညာပေးသင်တန်းများ ပို့ချပေးနေသူများ၊ ကျန်းမာရေးစောင့်ရှောက်ပေးနေသော ဆရာဝန် များနှင့် နိုင်ငံတကာမှ HIV/AIDS ဖြစ်ပွားမှု တားဆီးရေးအဖွဲ့ အစည်းများက မြန်မာနိုင်ငံရှိ ၁၉၄၉ ပြည့်တန်ဆာနှိပ်ကွပ်ရေးအက် ဥပဒေအစား လူသားတစ်ယောက်၏ ရပိုင်ခွင့် လူ့အခွင့်အရေး ရပိင်ခွင့်များနှင့် ကျန်းမာရေးစောင့်ရှောက်မှုအကာအကွယ်ပြုသည့် ဥပဒေအဖြစ် ပြင်ဆင်ရေးဆွဲပေးစေလိုသည့် စိတ်ဆန္ဒများရှိနေကြသည်။ မတူညီသည့် မြန်မာ့ယဉ်ကျေးမှုအသိုင်းအဝိုင်းကြား ဖြစ်တည် နေသော လူတစ်စုက ၁၉၄၉ ပြည့်တန်ဆာနှိပ်ကွပ်ရေးအက်ဥပဒေကို ပြင်ဆင်လိုချင်စိတ် မရှိသကဲ့သို့ လက်ရှိအတိုင်းထားလိုသည့် စိတ်ဆန္ဒများ ရှိနေကြသည်။

သို့သော်လက်ရှိတွင် မွေးဖွားစဉ်အချိန်မှ ယနေ့ထိတိုင် ပြည့်တန်ဆာဘဝသို့ ရောက်ရှိရပါလို၏ဟု ဆုတောင်း၍ မြန်မာနိုင်ငံအနှံ့အပြား ပြည့်တန်ဆာ အဖြစ် အသက်မွေးဝမ်းကျောင်းပြုကာ မိသားစုစားဝတ်နေရေး အ  ထောက်အပံ့ပြုနေသူများမှာ ဥပဒေအရအကာအကွယ်မဲ့နေကြပြီး ဖမ်းဆီးအရေးယူမှုများခံရကာ ထောင်နန်းစံနေကြရပါသည်။ အလားတူ လူမှုအသိုင်းအဝိုင်းကြားမှာလည်း နှိမ့်ချဆက်ဆံခံနေရခြင်းအပါအဝင် လူမှုအသိုင်းအဝိုင်းမှ ပယ်ထုတ်ခြင်းများကို လည်း ထိတွေ့ခံစားနေကြရပြီး ပြည့်တန်ဆာလောကအတွင်း သုံး စွဲသူများနှင့် ကြားခံပွဲစားများ၏ ခေါင်းပုံဖြတ်ခြင်းများကိုလည်း ရင်ဆိုင်ကြုံတွေ့နေရပါသည်။ ထိုဖြစ်ရပ်များနှင့်ပတ်သက်ပြီး ပြည့်တန်ဆာလုပ်ငန်းလုပ်ကိုင် နေသော မနန္ဒ(အမည်လွှဲ)က ''ဒီအလုပ် လုပ်ရတာလဲ အန္တရာယ်များ ပါတယ်။ ရဲဖမ်းလို့ ပြေးရတာနဲ့၊ အဝယ်ခေါ်လို့ လိုက်သွားတော့ အဖမ်းခံရတာနဲ့။ အဝယ်ခေါ်တယ်ဆိုတာ ဒီလို အစ်မတို့က ကား မှတ်တိုင်မှာ ရပ်နေတာလေ။ ကားနဲ့လာတယ်။ ခေါ်လို့ လိုက်သွား တယ်။ ဟိုကျတော့ အဖမ်းခံရတယ်။ အမှုဆင်ပြီး အသွင်ယူဖမ်း တာလို့ ပြောလို့ရတာပေါ့''ဟု သူမကပြောသည်။

ယင်းနောက် သူမက မိမိတို့တွင် မည်သူမျှ အကာအကွယ်ပေး မည့်သူမရှိကြောင်း၊ ရဲလိုက်သည့်အခါ ပြေးရကြောင်း၊ ရဲဖမ်းမည်ကို ကြောက်၍ ပြေးသည့်အခါ ကားတိုက်မှာလည်း မကြောက်ရွံ့မိတော့ ကြောင်း၊ ရဲများကလည်း ၎င်းတို့နှင့်ကျွမ်းဝင်သည့် လိင်အလုပ်သမားများဆိုပါက လွှတ်ပေးကြောင်း၊ ၎င်းတို့ အမှုလိုပြီဆိုလျှင် အမြင် မကြည်တော့သည့်သူများကို ဖမ်းဆီးကြောင်း၊ သူတို့ သုံးစွဲချင်ပါက အလကားသုံးစွဲကြောင်း စသည့်အခက်အခဲများဖြင့် ကြုံတွေ့ကြောင်း လိင်လုပ်သားအမျိုးသမီးဖြစ်သူ မနန္ဒ(အမည်လွှဲ)ကဆိုသည်။ ''အခု ဒီမှာရပ်နေတဲ့သူတွေအကုန်လုံးက ထမင်းငတ်လို့လာလုပ်ကြတာပဲ။ ဘယ်သူမှ မလုပ်ချင်ဘူး။ တချို့က ပြောကြတယ်။ နင်တို့က အမေပေးတဲ့ လယ်တစ်ကွက်နဲ့ အလကားလုပ်စားနေတာ။ အဲလိုလူတွေကို ပြောချင်ပါတယ်။ ကိုယ်နဲ့ သွေးမတော်သားမစပ်တဲ့ အမူးသမား၊ ဆေးသမားတွေနဲ့ ဘယ်သူက နေချင်မှာလဲ။ ဘယ်အရာမှ အလကားမရဘူး။ အစ်မတို့လည်း နောက်မှာ မိသားစုတွေရှိတယ်။ ဒီအလုပ်လုပ်ကြတာ တစ်ယောက်နဲ့တစ်ယောက် မတူကြဘူး။ မိသားစု ရပ်တည်မှုကြောင့် လုပ်ကြတယ်''ဟု သူမကလိင်လုပ်သား အမျိုးသမီးတွေဘဝရဲ့  ဖြစ်တည်လာပုံကို ကားမှတ်တိုင်မှာရပ်လျက် ဖောက်သည်ကိုမျှော်ရင်း ပြောပြနေသည်။ 

ရန်ကုန်တိုင်းမ်သတင်းအဖွဲ့
Loading...