Breaking News


ဆယ်ကျော်သက် အမျိုးသမီးအချို့ လေ၀င် လေထွက်မကောင်းသည့် အ၀တ်အစားများကြောင့် ပေါင်ခြံတွင် ပွေးပေါက်လာ

Loading...
                             


ဆယ်ကျော်သက် အမျိုးသမီးအချို့ လေ၀င်လေထွက် မကောင်းသည့် အ၀တ်အစားများ ၀တ်ဆင်ခြင်း၏ အကျိုးဆက်အဖြစ် ပေါင်ခြံကဲ့သို့နေရာများ၌ အရေပြားမှိုရောဂါတစ်မျိုးဖြစ်သည့် ပွေးပေါက်ခြင်းများဖြစ်လာကြောင်း အရေပြားအထူးကုဆရာဝန်ကြီး ပါမောက္ခဒေါက်တာခိုင်ခိုင်ဇော်က ပြောသည်။

ယခုခေတ်တွင် နေထိုင်မှုပုံစံပြောင်းလဲပြီး ရာသီဥတုနှင့် မကိုက်ညီသည့် ဂျင်းဘောင်းဘီရှည်၊ အသားကပ်ဘောင်းဘီများကြောင့် လေ၀င်လေထွက်မရှိဘဲ ခန္ဓာကိုယ်မှထွက်သည့်ချွေးနှင့် ပူနွေးစိုစွတ်ပြီး ယင်းကဲ့သို့ဖြစ်လာရခြင်းဖြစ်ကြောင်း ၎င်းကဆိုသည်။

‘‘အခုခေတ်မိန်းကလေး(၁၆)၊ (၁၇)နှစ်အရွယ်လေးတွေ ပေါင်ကြားမှာ ပွေးပေါက်လာကြတယ်။ ကိုရီးယားယဉ်ကျေးမှုခေတ်စားပြီး ရာသီဥတုနဲ့ မကိုက်ညီတဲ့ အ၀တ်အစားတွေ ၀တ်ကြတာကြောင့်လို့ ပြောရင် ကြိုက်ချင်မှ ကြိုက်မယ်။ အမှန်က ရာသီဥတုကပူ၊ ချွေးက ထွက်၊ လေ၀င်လေထွက်မကောင်းတော့ မှိုပိုးကပေါက်လွယ်တယ်။ မှိုပိုးက ရေစိုမယ်။ ပူအိုက်မယ်၊ နွေးထွေးတဲ့ အနေအထားကို အကြိုက်ဆုံးပဲ’’ဟု ဒေါက်တာခိုင်ခိုင်ဇော်က ရှင်းပြသည်။

ပွေးပေါက်ခြင်းသည် ၀မ်းဗိုက်ပိုင်း၊ ကျောပိုင်းနှင့် ရင်ဘတ်ပိုင်းများတွင် ပေါက်လေ့ရှိသော်လည်း ပေါင်ခြံ၌ အများဆုံးပေါက်တတ်ကြောင်း၊ ပွေးပေါက်ခြင်းကြောင့် အရေးပြားယားယံမှုလွန်စွာခံစားရပြီး ကုတ်ခြစ်ရာမှတစ်ဆင့် ပိုးဝင်ခြင်း၊ ဗက်တီးရီးယားပိုးကြောင့် ပြည်တည်ခြင်းများဖြစ်တတ်ကြောင်း ၎င်းကဆိုသည်။
‘‘ပွေးက အနွေးဓာတ်၊ ရေဓာတ်၊ အပူငွေ့ရှိတဲ့နေရာမှာဖြစ်ရင် ကြာရှည်စွဲတတ်တယ်။ တော်တော်နဲ့ မပျောက်တတ်ဘူး။ ဒါကို ပျောက်ချင်ဇောနဲ့ တွေ့ရာဆေးတွေ လိမ်းကြတဲ့အခါ အရေပြားက ရိသွားတာ၊ ပြဲထွက်သွားတာ တွေဖြစ်ကြရော။ အရမ်းကြောက်ဖို့ ကောင်းတယ်’’ဟု ဒေါက်တာခိုင်ခိုင်ဇော်က ပြောသည်။

အရေပြားလိမ်းဆေးများကို အလွယ်တကူဝယ်ယူပြီး မလိမ်းသင့်ကြောင်း၊ အချို့ဆေးများတွင် စတီးရွိုက်များပါဝင်သောကြောင့် အရေပြားရိခြင်း၊ ပြဲခြင်းများဖြစ်တတ်၍ တတ်ကျွမ်းနားလည်သည့် ဆရာဝန်များနှင့် ပြသတိုင်ပင်သင့်ကြောင်း၊ အရေပြားမှိုစွဲခြင်းကိုလိမ်းဆေးအပြင် လိုအပ်ပါက သောက်ဆေးနှင့်တွဲဖက်ပြီး ကုသကြောင်း ၎င်းကဆိုသည်။

Credit: 7day daily
Loading...